Nog eem ien leste test-runtien, ‘t leek ‘m nog weh zo’n goed idee. Dat was een minuut of viere geleedn, now effie de pliesie achter ‘m an. Opzich hiel gien wonder, ‘t snerpende geluud van zien Honda MT5 zonder uutloat dut mienigiene de vingers in de oorn stoppn. Het let zich doarumme nogal snel roadn woar of as Gait en zien rood/witte moat riedn.
As ze riedn tenminste. Veurasnog stet Gait zien kans af te wachtn tut i-j zien Japanse rappe fiesse weer an kan trappn umme d’r vandeur te goan. I-j ef ‘m verdekt oppestelt achter zo’n stroom-uusien, te wachtn op de pliesiewaagn die zo hoast wel veurbi-j mut koomn, zodat i-j zelf de aendere kaante op kan skeurn. In zien eufd ef i-j de vluchtroute al weh kloar, richting de stroate die as ze af-e-sleutn ebbn weegns riolerings-waerkzemeedn. Op dat stuk kan i-j zien winst pakken, alienig mut i-j doar nog wel eem koomn.
Schichtig kek i-j umme zich hen, zelfs de brommer vast in de eerste versnelling zett’n maakt veur zien idee een hels kabaal. Vanuut zien ooghoeken ‘eurt i-j stapvoets een auto aankoomn. Bi-j de pliesie bin ze ook niet ielemoale achterlijk, die wietn dat i-j doar ens mut zittn. Ook disse keer riedn ze stillegies zien schuilplek veurbi-j, met het aerte in zien keel ziet Gait de dienders in de auto tuurn noar dat keerltien en zien brommer. Het kump an op timing, i-j at bedacht dat de pliesie net de bochte deur moss ween zodat ze niet metiene kond’n keern umdat er waerkbussies langs de stoepe geparkeerd stoan. En dan mu-t i-j toesloan. Zelden em die hooguut ‘onderd meter langer mun anvuuln as ooit. Asof a-j noa een eumpien stappn zo’n klef breutien Bapoa in de magnetron kloar ant maakn bin en de seconden weh veuriet kun kieken.
I-j kek ze noa, de kolde april-oamd dut zien oasem wit ekruld uut zien mond stroom’n. De auto is uut zicht, dit is zien moment. De kickstart is te gevoarlijk. Gewoon in zien één, de koppeling in en draevm. De eerste drie meter eurt i-j de tank klotsen, de adrenaline giert ‘m deur de balg. I-j löt de koppeling lös, hortend en stotend ontwaakt het Japanse skeurmonster en kump as ien vuurspi-jnde vulkaan tot leem. Die iele stroate ef ‘m wel e-heurt, en niet allienig de stroate gokt i-j zo. De eerste meters goan goed, Gait knalt er vandeur en knapt met hoge snelheid deur de stroatn. Noa goed twintig seconden kleurt de ‘uuzn blauw deur de pliesielaempies en de sirene joelt boom zien geknetter uut. Het kat en muisspel is begunn’.
Binnenbochten wurdn e-neumn asof i-j wekelijks op Assen an’t rieden is. Drempels wurd’n e-neumn asof i-j in opleiding bi-j de KLM is. Een kapotte kilometerteller maakt dat i-j gien idee ef ‘oe aerdt as i-j get. Zestig? Zeumtig? Zeg’t maer.
As troef ef i-j nog ‘t plantsoen oppeneum in zien route, maer i-j verwacht dat zien moatn van de overheid gewoon achter ‘m an deur ‘t parkien roazn. Vanaf de Greente knapt i-j de stoepe op en ‘t plantsoen in. En joa eur, de dienders goat vrolijk achter ‘m an. In het planstoen goesde de wiend deur de bomen, twie vri-jnde knienegies wurd’n deur Gait en zien achtervolgers wreed uut mekare e-dreem tijdens het paringsritueel. I-j mos nog uutkieken er gien iene veur de brommer te kriegn, maer dat gink goed. An de doffe bons te eur’n ef iene van de twie knienties minder geluk e-had bi-j de pliesieauto.
I-j red asof i-j de hoofdrol spuult in zien egns Hollywood-film, het ‘mwhoaaaap, mwhooaaaap’ wat zien brommer produceert bij elke gashandeling maakt bi-j Gait zoveel testosteron an dat i-j astwoare zweeft deur’t plantsoen. Zien vakkunding met plakbaand vast-e-maakte rood-wit-blauwe plastic vlaegien eft mulijk umme overend te bliem. De pliese kreg deur dat ze an Gait ’n kwoaje dobber em-e-kreegn. An’t einde van ‘t plantsoen zit ter eugte van’t bruggien zo’n mooi bultien. Gait en zien MT stoevm met volle vaert over de bulte en koom lös van’t wegdek. Een keerl die er toevallig zien untien ant uutloatn is, mut hoaste denk’n dat i-j terechte is e-koom in een aflevering van ‘The Dukes of Hazard.’
Het huzarenstukkien van de rit is doarmee begunn’. As ‘n dolle skeurt i-j via de kruusing Koppel-Blokhuisweg over klinkerties van de Achterweg, slalommend tussen de wilde kliko’s die doar altied maer an de weg liekn te stoan, richting de Bodemansteeg (dat streutien tussen de Achterweg en de Langestraat). Vanuut de Bodemansteeg, metiene rechts de Langestraat in en doarnoa links de Simondsstraat in. Gait wist: die em’ ze weer ies lös-e-breukn, met zo’n rioleringsbuis dwars over de stroate teegn sluipverkeer. Want bi-j de gemiente wietn ze ook: een Gaellemuniger löt zich maer zo niet teegnoln deur zo’n suffig afzethekkien. Met de bromfiesse ku-j doar echter nog prima langes.
I-j slingert zien skeuriezer veurbij de rioleringsbuis de tiedelijke zaandbak in, met in zien kielzog de loeiende sirenes van de pliesie. Al uutkieknd veur verdwaalde klinkers, blek zien Japanse moat ook een prima part-time crossfiesse en noa zo’n ‘onderd meter deur ‘t mulle zaand ‘eurt i-j gien sirenes meer. Gait kek achterumme en ziet zien achtervolgers stoan bi-j de rioleringsbuis. De iene pliesieagent dut nog een verwoeste poging deur ‘t zaand te dreavm, maer kek noar drie meter wat veralderiert veur ‘m uut. De aander gooit met vuule geheister zien pliesiepette op de grond.
En Gait? Die zwaait nog nog eem en kachelt met gepaste spoed op huus an.
Loat de Koningsnacht maer koom.